Phile | EMI | STEP |

Uru ngai etikirighi Pol ghe pitiela ta Pilimon

Philemon

1 Aghi Pol, tau karavusu ieghi mausi Iesu Karisto, me Timoti kapuita ia.

Apitipiti aatu etam Pilimon, masi kapuimami eteva, me tau ngai uungu eitaua teeiemami io. 2 Me angalu suusuu masimasiaangalua ta kapuingalua vause ateva Apfia me ta Akippus tau ngai uvi eitaua teiengalua tale masi kiukiu eteva, me ta tau ngaiesoa ngatoa la mae veluvelu eitaua tanganuem.

3 Maamasinaane me luei eteva ekasukasu ta God Tamaita ia me Vau ngepona ateva Iesu Karisto aue toka teeiem.

Nikaili emasina me nilooloo sae

4 Nau etoa aghannainio tale kalughu nilooloo sae, akaakaili emasina ta kapughu Goto ateva, 5 poli anongonongo aikaaiaam ta Vau ngepona Iesu me ailousiaam ta lo atoa manga ila. 6 Alooloo sae va ughele livalivasanaaili tani aulia ta mene katoa aikaaiaam me aue ughele kila amasinaaili isaa akapa masi voto ita ghaaghaa ta Karisto. 7 Aielousiaam ghe tau mae sio kinatama nimasimasi me eaasarasarakanaieghi poli io, masi kapughu eteva, ugheelei urunguitaniira lo atoa manga ila tani mene ateatea ngamasina.

Pol ghe looloo luei mausi Onesimas

8 Liuna avalua o me arongona ta, ta Karisto karika amaamatautu tani ppooa ngasarasarakana saa ateva erooroo tani gheleia, 9 me karika, ta akolokolo tauo tale uungua niaielousi eteva. Aghi Pol, tau ngaimatoonga ieghi me karavusu ieghi ta Iesu Karisto, 10 akolokolo tauo mausi natughu ta Onesimas, ghe natughuiela nau atokatoka tale ale mata voovoo. 11 Nau to ang ghe lao sio, karika righi uunguaane ta ngetam me isaa oia nau ang ghe uunguaanela mane etam me etaghi namungaili. ^{▼▼11Tale inangari nge Grik, Onesimas malloeana va “ghelei masi niuungu eooroi”.}

12 Ngamene sungisungie aatu etam tee me urunguitanighi eteva. 13 Aghe annala va ghe toka teeieghi tani ghaa lium ateva tani sausieghi nau atokatoka tale ale mata voovoo mausi masi kiukiu. 14 Me karika aghanna tani aulia voto va ughelei ta saa llo voto ughelei, ughelei tale aloaloanaam, me karika va la sulungio tani ghelei. 15 Koti aghanna ngavalua toko va Onesimas ghe kasu vuliola tale nau karika aluse, va nau ekiria mae etam, aue toka laalaa liu teeio. 16 Karika va nongina tau ngai uungu ia karika etokatoka tale aloanaane, ta elaulau tau ngai uungu eteva karika etokatoka tale aloanaane, masi kapum ateva. Masinaaili ia etaghi me maamasinaane etam aue namungaili va kapum tau ngai uungu ia, me kapum ia mausi Vau ngepona ateva.

17 Liuna avalua o me poli utaataraieghi va kapum ieghi, ughaaia nongina va ughaaghaaieghi. 18 Arova ghe gheleila righi voto sesa o ghe tam liula voto ghe ghaala, uatoka sae maate ateva etaghi. 19 Aghi Pol apitipiti isaa oia inangari ta nimaghi va aue aliu isaa o voto. Me karika aghanna tani aulia va io tee karika ughe liu voto aghe gheleila tale maamauluaam. 20 Aghannaaili, kapughu, va arova aghele ghaa righi nimasimasi etam ta Vau ngepona tani mene ateatea ngamasina tale urunguitanighi eteva ta Karisto. 21 Poli aghaiesoangaili tale nongonongo usilaam, liuna avalua o me apitipiti etam. Akilakila va aue ughelei oroi voto epona tale llo voto aghe kolomiola va ughelei.

22 Me mene kateva voto: uaimanomanosia tiulu rum nau aghatu aue atoka etana, poli aghaiesoa va aue amae taraiem mausi niliu tale kaluimim nilooloo sae.

23 Epapras angalu kaakaravusu eitaua ta Iesu Karisto, esuula masimasiaane etam. 24 Me Mak tee me Aristakus, Demas me Luk ila o lo atoa la uungu teeieghi, la suula masimasiaaira.

25 Maamasinaane Vau ngepona ateva Iesu Karisto aue toka tee kapuimim spiriti eteva.